Wednesday, November 21, 2018

ඩූ ඕ ඩයි!


සියල්ලෝ (මමද ඇතුළුව) තම තම නැණ පමණින් තම සිත් මනාපකම් තරමින් මේ නාටකයට විටෙක හුරේ දමමින්ද විටෙක කඳුළු පෙරමින්ද සිටී. දැන් සති තුනක සිට රට ඔටෝ පයිලට්ය. මීට පෙර පැයෙන් පැයට ෆලෝ කල ඩොලරය සිතු සේ පල්ලම් බසී. එකෙකුටවත් ගානක්වත් නැත. ශ්‍රී ලංකා ඉතිහාසයේ ගෙවිය යුතු විශාලම ණය වාරිකය කට ළඟය. ණය ගෙවන්න තියා ගත්තු ණය ටික පිළිවෙලකට වියදම් කරගන්නවත් ප්ලෑන් එකක් නැත. රනිල් හොර පාරෙන් අගමැති කරද්දී කට පියාගෙන උන් උන් (ආයෙත් මමද ඇතුළුව) මහින්ද හොර පාරෙන් අගමැති වෙන කුලප්පු වෙයි . මෛත්‍රී ව්‍යවස්ථාවෙන් සුරුට්ටු ඔතද්දී හුරේ දාන උන් කරු ව්‍යවස්ථාවෙන් විට හදන බව කියමින් කන්කෙඳිරි ගායි. මේවාගේ නීතිමයභාවය ශ්‍රේෂ්ඨාධිකරණය විසින් බලාගනු ඇත. හැබැයි මේ සියල්ල සදාචාර විරෝධීබව හෝඩියේ පන්තියේ එකෙකුට උනත් තේරෙන බැවින් අපිට නොතේරෙන්න නම් අපි ඊටත් වඩා බබ්බු විය යුතුය.
දැන් වී ඇත්තේ සදාචාරය සම්ප්‍රදාය නීතිය පසෙක දමා කෙසේ හෝ බලය ලබා ගත යුතුය යන්න දේශපාලකයන්ගේ ඔළුවලට විතරක් නොව අනුගාමිකයන්ගේ ඔළුවලටත් ඇතුළුවී තිබීමයි. ඒ සඳහා මහින්ද ආවොත් හොරු නැගිටිනවා රනිල් තව හිටියොත් රට විකිනෙනනවා ආදී වශයෙන් දෙපාර්ශවයෙන්ම සාධාරණීකරණ සටන් පාඨ සූදානම් කරගෙන ඇත. මහින්දට සහ මෛත්‍රීට පාර්ලිමේන්තුවේ බහුතරය ගරු කරන්නට කැමැත්තක් නැතුවාසේම රනිල්ට මේ මොහොතේ මහජන මතය විමසන්නටද කැමැත්තක් නැත. කුමක් නාමයෙන් කලත් මේ සියල්ල පිටුපස ඇත්තේ ඔබටත් මටත් රටටත් ඇති ආදරය නොව, ඉතාම පෞද්ගලික උවමනාවන් ඉටු කර ගැනීමේ බල අරගලයකි. එසේ නැතිනම් මේ පසුගිය සති තුන තුල රටට සිදුවූ විනාශය දැක දැකත්, පරිනත වැඩිහිටියන් සේ මෙය විසඳා ගැනීමට තනනවා මිස පෙම් ත්‍රිකෝණයකට මැදිවූ නාඹර ගැටවුන් ගැටිස්සියන් සේ එහෙට මෙහෙට ඔක්කම් පපා ඉන්නේ නැත. මේ නාටක දැක “ලංකාව කියල නොම්මර එකේ රටක් තියනවා, හැමෝම යන්න” කියා ලෝන්ලි ප්ලැනට් සඟරාවේ ලියූ එකා පාරේ බැහැල යන්න බැරිව සිය දිවි නසා ගත්තේ නැත්නම් පුදුමය.
මෛත්‍රීට ඇත්තේ තවත් වරක් මෙම පුටුවේ ඉඳ ගන්නට ඇති ආසාවත් කිසිදා දේශපාලනයට නොගෙනනවායැයි දහ අතේ පොරොන්දු දුන් සිය දරුවන්ට දේශපාලන අනාගතයක් හදා දීමත්ය. තමාට කියා චන්ද පදනමක් නැති මෛත්‍රී ඒ සඳහා මහින්ද රනිල් දෙදෙනාගෙන් එක් අයෙකු ඒ සඳහා ඉත්තෙකු කරගත යුතුය. ඒ ඇරෙන්නට මෛත්‍රීට රනිල් සමග පෞද්ගලික අමනාපයක් ඇති බවක්ද පෙනේ. මහින්දට මේ මොහොතේ ඇති එකම අරමුණ තම ලොකු පුතාගේ දේශපාලන අනාගතය සුරක්ෂිත කිරීමය. ඒ සඳහා පවුලතුලිනුත් ඉන් පිටතිනුත් එන තර්ජන වලක්වාගැනීමට හොඳම ක්‍රමය 2025 වන තුරු තමා හෝ තමාට පාලනය කල හැකි කෙනෙකු අත බලය තිබීමය. තව අවුරුද්දකින් රටේ ජනතාව බන්දේසියක තබා රට තම පිලට බාරදෙන බව දැන දැනත් මේ නරාවලට පැන්නේ ඒ නිසාය. රනිල්ට මේ අවසන් සටනයි. මේ අගමැතිකම නැතිවූ සැනින් රනිල්ගේ දේශපාලන දිවිය අහවරය. මීට පෙර කෑ ලණු වලින් පරිනත වී ඇති සජිත් ඇතුළු කණ්ඩායම නියම මොහොත එළඹෙන තුරු බලා සිටින්නේ නිල බලා පහර දෙන්නය. මෙය තිදෙනාටම ඩූ ඕ ඩයි සටනකි. ඒ නිසා මේ තිදෙනාගෙන් කිසිම අයෙක් මේ මොහොතේ රට ගැන සිතා පසුබසින්නට සුදානම් නැත.

Thursday, November 01, 2018

කවුද මේ ?



A, B සහ C කියල පොරවල් තුනක් ඉන්නවා.
A කියන පොර ක්‍රිස්තියානි ආගමට බටහිර සංස්කෘතියට බර පොරක් කියල තමයි කියන්නෙ. මිනිහට කැමති නැති අය කියන විදිහට, මිනිහ තමන්ගෙ බිස්නස් පාට්නර්ස්ල එක්ක එකතුවෙලා රට ගැන හිතන්නෙ නැතුව ඒ කීප දෙනාට ඕන විදිහට වැඩේ ගෙනියනවලු. තමන්ට හිතවත් කොල්ලන්ට තැන දෙන ගමන් අනික් උන්ව කපනවලු. තමන්ගෙ තැන රැකගන්න උඩට එන උන්ට වෙට්ටු දාල අයින් කරල දානවලු. හැබැයි මිනිහට කැමති කට්ටියනම් කියන්නෙ, මිනිහ තරම් මේකට සුදුසු පරිණත කෙනෙක් තාම නෑ කියල. සුදුස්සෙක් එනකල් මිනිහම හොඳයි කියල.
B කියන්නෙ මේ ප්‍රශ්න වලට වැඩිය අත දාන්නෙ නැතුව පැත්තකට වෙලා තමන්ගෙ වැඩක් කරගෙන හිටපු කෙනෙක්. කැපිලි කෙටිලි මැද්දෙන් පොඩි තැනක ඉඳන් උඩට ආපු මෙයා රෝල් එක මාරු කරලා එක පාරටම උඩට එනව. පොඩි මිනිස්සුන්ව එකතු කරල අරන් ලොකු ලොකු අය බිම දාන්න කියාපු මනුස්සයා කියල තමයි කියන්නෙ.
C කියන පොර හොඳ සිංහල බෞද්ධයෙක්. රට ජාතිය ගැන හැම වෙලේම හිතන කෙනෙක්. අනික් අය ජාත්‍යන්තරයට මුදල් වෙනුවෙන් රට පාවල දෙද්දි නොසැලුන කෙනෙක්. මීට කලින් වැඩේ රන් කරගෙන ඉඳල පස්සෙ දාල යන්න උනු කෙනෙක්. හැබැයි එයාට කැමති කට්ටියනම් කියන්නෙ හැමෝම එකතු කරගෙන මේ වැඩේ කරන් යන්න හොඳම කෙනා එයයි කියල. හැබැයි වැඩේ කියන්නෙ මිනිහ ඩොමෙස්ටික් පැත්ත හොඳට කරාට ජාත්‍යන්තර පැත්තට ගියාම ටිකක් අවුල්.
ඔන්න ඉතින් C වැඩේ රන් කරගෙන යද්දි ටික ටික රටේ නම වල පල්ලට යන නිසා කට්ටිය එකතුවෙලා B ව කැමති කරව ගත්ත වැඩේ ගොඩ දාල දෙන්න කියල. Aත් මේ වැඩේට සෑහෙන සහයෝගයක් දුන්න කියල තමයි කියවුනේ. හැබැයි B එද්දිම කිව්ව මේක කරන් යන්න හොඳම මනුස්සය A ඒක නිසා එයාව මේක රන් කරන්න දාන්න ඕන කියල. ඔන්න AB දෙන්නම එකතු වෙලා වැඩේ කරගෙන යනව. හැබැයි එන්න එන්නම වැඩේ තවත් වලපල්ලට යනව මිසක් ගොඩ ඒමක් නෑ. ඔහොම ගිහින් ගිහින් බැහැල බැහැල පල්ලහටම බැහැපු දවසක හිටි ගමන් B කියපි A ගේ රන් කරන්න බැරිකම තමා මේ ඔක්කොටම හේතුව අපි Cට වැඩේ බාරදෙනව කියල. මගේ මොකද්ද අඩුපාඩුව කියල අහල A ලියුම් පිට ලියුම් ලිව්වත් මාධ්‍ය නිවේදන දැම්මත් B නෙමේ කනකටවත් ගත්තෙ.
දැන් ළමයි කියන්න බලන්න A, B, C කවුද කියල.
A = ඇන්ජලෝ මැතිව්ස්
B = චන්දික හතුරුසිංහ
C = දිනේෂ් චන්දිමාල්
ඔයාලත් හිතුවෙ ඒකම නේ ?
 - දසයා

Tuesday, November 17, 2015

අසාධාරණයි යකෝ...

මොකද ඩෝ හැම තැනම සුදු කොඩි
වලව්වේ මහ ගෑනි මලහම
එක කොඩියක් එල්ලුවද
අපේ අම්මගෙ මළගමට
ගලෝපියව් ඔය ඔක්කොම
යන්නෙපා ඕකුන්ගෙ ලෙවකන්න
බඩට දන්කුඩ නැතත්
අපිත් රැස්පොට් නැද්ද
(අදින් වසර විස්සකට තිහකට පෙර ගමක සිදුවූ සිද්ධියකි.)
- දසයා